Прокуратура: Шу ауданында екі жасырын ойын залы анықталды

Ойын тәуелділігі байқалған азаматтардың ауыр қылмыс жасау фактілерінің анықталғанына байланысты Шу ауданаралық прокуратурасымен ойын бизнесінің заңсыз ұйымдастырылуының жолын кесу бойынша шаралар қабылданды.

Мысалы, ауданда қойма меңгерушісі 8 млн. теңгені жымқырып, ол үшін 4 жылға бас бостандығынан айыру жазасына сотталды, зерттеу барысында анықталғандай соңғы ақшасын 5-6 күннің ішінде букмекерлік кеңседе ұтылған.

Осыған ұқсас, мал шаруашылығы қызметкері букмекерлік кеңседе 5 млн.теңгеге бөтен мүлікті жұмсаған.

Сондықтан, прокурор алдын ала Мемлекеттік кірістер басқармасында ауданда тіркелген букмекер кеңсесінің тек бір ғана болуын анықтап, уәкілетті органдармен бірлесіп жедел-іздестіру іс-шараларын жүргізуді ұйымдастырды.

Нәтижесінде, дүкенде және қонақ үйде заңсыз ойын бизнесін ұйымдастырудың екі фактісі анықталды, онда 15 компьютер мен 13 процессор тәркіленді. Кінәлі адамдар ҚК-нің 307-бабының 1-бөлігімен (заңсыз ойын бизнесін ұйымдастыру) сотқа жолданды.

 Айта кету керек, жыл басынан бері облыс бойынша сотқа дейінгі тергеп-тексерудің бірыңғай тізіліміне заңсыз ойын бизнесін ұйымдастырудың 11 фактісі тіркелген, оның ішінде 10 іс сотқа жолданып, қазіргі уақытта 2 азамат түрлі жазаға тартылды.